Bocado de freo ou pasarrendas de cabalo
Completo, feito a molde polo sistema da cera perdida. Represéntanse dous felinos (panteras) afrontados e coas cabezas voltas cara atrás; vai decorado con incisións feitas cun buril, máis marcadas nas cabezas e máis leves, a base de círculos, nos corpos dos animais.
Esta peza ten un paralelo igual, pero ó que lle falta a cabeza dun dos felinos, neste xacemento e ambos os dous documentan a presenza de, polo menos, un exemplar de cabalo como elemento de carga e transporte pero igualmente, sen dúbida, como signo de poder e de prestixio; na mesma zona achouse tamén un óso metatarso de équido. Estes achados producíronse ademais nunha das construcións máis singulares, situada no centro e na parte máis preeminente da croa do castro. Os dous pasarrendas, feitos en bronce fundido a molde pero completados cunha posterior decoración incisa a buril, representan un motivo que parece facer referencia á mitoloxía relacionada co deus Apolo e proceden da parte oriental do Mediterráneo. Aparecen tamén noutras pezas similares do leste e sur de Hispania que corresponden así mesmo á etapa final do Imperio Romano (séculos IV e V).
