16 DE NOVEMBRO. DÍA DO PATRIMONIO MUNDIAL
O 16 de novembro celébrase o Día do Patrimonio Mundial (UNESCO), con tal motivo o Museo do Castro de Viladonga realizará os días 16 e 17 un obradoiro de cestería tradicional de colmo, a cargo da artesá Lola Tourón. Esta actividade ten como finalidade recuperar e difundir este rico patrimonio etnográfico. A técnica de colmo, unha da máis antigas, ilustra o uso de pezas de cestería en época castrexa que non se conservan por tratarse de materiais orgánicos perecedoiros.
Tamén se expoñerá un vídeo documental: “O José Da Veiga cesteiro centenario” que consiste nunha entrevista a un veciño de Cospeito na que conta a súa experiencia coa cestería ao longo da súa dilatada vida. Un exemplo de recuperación de patrimonio inmaterial realizada por Sonia Engroba Cabana e Antón Figueira.