Fragmento de tégula ou tella plana
Fragmento, de forma triangular, dunha tégula ou tella plana de barro con bordo de sección trapezoidal. Fabricada con pasta de cor ocre e con presenza de degraxante cuarcífero. Na parte anterior, preto do reborde, leva un selo impreso de forma circular, con letras en alfabeto grego.
Este anaco de tella é un claro indicador da ocupación do castro de Viladonga en época galaico-romana. Dentro deste tipo de pezas, moi comúns no castro, ésta ten a particularidade de presentar un selo impreso escrito en alfabeto grego, coa palabra Aquidon ou Ajidon, que pode ser o nome do seu fabricante -só documentado ata agora neste xacemento galego- ou ben que faga referencia á función ou destino, ou mesmo ó propietario, da construción á cuxa cuberta pertencería.
